2018-imi utoqqalinermi aamma siusinaarluni soraarnerussutisiallit
Saqqummersitami matumani ukiuni 2014-imiit 2018-imut qaammat decembarimi utoqqalinermi aammalu siusinaarlutini soraarnerussutisiallit amerlassusaat naatsorsorneqarput.
Saqqummersitap ilusilersornera
Immikkoortut aappaanni utoqqalinermi siusinaarlunilu soraarnerussutisiallit pillugit kisitsisit pingaarnersiorneqarput. Kisitsisaataasivimmilu tabelini soraarnerussutisiallit suiaassusaat, ukiui kiisalu najugaq pingaarnertut sammineqarput. Saniatigut soraarnerussutisianik pisartagallit kisimiittutut imaluunniit aappariittut pisartagaqarnersut sammineqarput, tassani aningaasat tunngaviusut tiguneqartartut nammineq aapparisalluunniit isertitai malillugit ilanngagaasarnersut imaluunniit ilanngariikkanik (kaasarfimmiunik) pisartagaqartuunersut, utoqqaat illuanni imaluunniit ullukkut unnuakkullu inissiisarfimmiinneq pissutigalugu.
Immikkoortut pingajuanni soraarnerussutisiallit ukiunut siuliinut naleqqiullugit amerleriarneri ikileriarnerilu sammineqarput. Immikkoortut pingajuat kisitsisaataasivimmi tabelinik marlunnik soraarnerussutisiallit amerleriarnerinut ikileriarnerinullu kisitsisinik saqqummersitami matumani ilanngunneqarsimasunik tunngaveqarpoq.
Immikkoortut sisamaanni inatsit tunngaviusoq aammalu pisortanit soraarnerussutisiaqalernissamut piumasaqaatit pingaarnersiorneqarput. Jaanuaarip aallaqqaataat 2016 aallarnerfigalugu utoqqalinermi soraarnerussutisiat allanngorput. Allaannguummilu pingaarnerpaaq tassaavoq aapparisap isertitaanut attuumassuteqanngitsumik, namminerli saniatigooralugu akissarsiarisimasat tunngavigalugit aningaasat tunngaviusut annertussusissaannik atuutsitsilerneq.
Juulip aallaqqaataani 2016-imi siusinaarluni soraarnerussutisianut aaqqissuusseqqinneq atuutilerpoq. Siusinaarluni soraarnerussutisiallit inuussutissarsiornermi pisinnaasaat ukiut tallimakkaarlugit nalilersorneqartassapput. Soraarnerussutisiat inuussutissarsiornermi pinginnaasat malillugit tunniunneqartassapput, akinullu qaffasinnerpaanut, akunnattunut appasinnerpaanullu immikkoortitigaallugik.
1.januaari 2017 aallarnerfigalugu utoqqalinermi soraarnerussutisiaqarnissamut ukiut killigititat 65-imiit 66-inut qaffanneqarput.
Tamanna kisitsisitigut paasissutissani ukiunut nalunaarsuutaasartut 2011-miit 2016-imut 65-imiit 69-imut nalunaarsorneqartarsimasut aammalu 2017-imi 2018-imilu 66-imiit 69-imut nalunaarsorneqartarsimasut “70-it inorlugit ukiullit”-nik taaneqarnerannik kinguneqarpoq.
Taamatuttaaq siusinaartumik soraarnerussutisialinnut nalunaarsuutit 2017-imi taamaallaat 65-inik ukiulinnik imaqarsimasut massakkut “65 +”-inik ilaneqarput.
Kisitsisitigut paasissutissat kommunit soraarnerussutisianut naatsorsuuserisarfiinit Naatsorsueqqissaartarfiullu inunnut nalunaarsuiffianit nalunaarsuutit tunngavigalugit pilersinneqarput. Immikkoortut tallimaanni nalunaarsuutit tunngaviusut taakkulu suliarineri kiisalu periaaseq nassuiarneqarput.
Naatsorsuutinit allanit assigiinngissutit
Naatsorsueqqissaartarfiup saqqummersissimassaani ”20XX-imi isumaginninnermi ikiorsiissutinik pisartut”-ni utoqqalinermi siusinaarlunilu soraarnerussutisianut kisitsisit allaanerupput. Naatsorsuinermi periaatsit assigiinngissutaat nalunaarsuutinut tunngaviusunut periaatsimullu immikkoortumi takuneqarsinnaapput. Saqqummersitaq pineqartoq ullumikkut atorneqanngilaq, kisitsisaataasivimmili tabeli ”2009-miit 20XX-mut isumaginninnermi tapiissutit (SOX0020)” ingerlateqqinneqarpoq.
Saqqummersitap matuma saniatigut aamma ”20XX-imi utaqqiisaagallartumik isertitanut taarsiissutaasunik ikiorsiissutit”-nik, ”20XX-imi ineqarnermut tapiissutit”-nik kiisalu ”20XX-imi meeqqanut tapiissutit”-nik taarserneqarpoq.
Kisitsisaataasivik
Kisitsisaataasivimmi kisitsisitigut paasissutissanik nammineq toqqartukkanik aallertoqarsinnaavoq, tassani najugaq, ikiorsiissutit suussusaa, ukiut, suiaassuseq, ukioq kiisalu soraarnerussutisiat annertussusaat katiternissaannut periarfissaqarpoq.